Fundur Antonys J. Blinken, utanríkisráðherra Bandaríkjanna, og Þórdísar Kolbrúnar Reykfjörð Gylfadóttur utanríkisráðherra símleiðis fyrr í þessum mánuði, og fréttatilkynning bandaríska utanríkisráðuneytisins í kjölfarið, er enn ein birtingarmynd aukins áhuga bandarískra stjórnvalda á því að styrkja tengslin við Ísland þegar kemur að varnarmálum en í tilkynningunni segir að ráðherrarnir hafi meðal annars rætt um vaxandi samvinnu í varnarmálum eða eins og það er orðað í henni „deepening defense cooperation.“
Fram kemur að Blinken hafi óskað Þórdísi til hamingju með að hafa tekið við embætti utanríkisráðherra og lagt áherzlu á stuðning Bandaríkjastjórnar við sterkt tvíhliða samband Íslands og Bandaríkjanna. Ráðherrarnir hafi að öðru leyti rætt um sameiginlegar áherzlur ríkjanna. Þar á meðal öryggi Evrópuríkja með hliðsjón af hernaðaruppbyggingu rússneskra stjórnvalda og stuðning við fullveldi Úkraínu, loftlagsmál, efnahagsleg tengsl og fjárfestingar og mannréttindi og kynjajafnrétti á alþjóðavísu auk varnarmálanna.
Þverpólitískur áhugi á því að styrkja tengslin
Háttsettir bandarískir ráðamenn hafa í auknum mæli heimsótt Ísland síðustu ár samhliða því sem áherzla hefur verið lögð á endurbætur á aðstöðunni á Keflavíkurflugvelli og aukna nýtingu hennar. Fyrir utan Blinken, sem heimsótti landið síðasta vor í tengslum við fund Norðurskautsráðsins, má nefna forvera hans Mike Pompeo, varaforsetann fyrrverandi Mike Pence og Robert S. Work, aðstoðarvarnarmálaráðherra í ríkisstjórn Baracks Obama. Áhuginn á því að styrkja tengslin við Ísland er með öðrum orðum þverpólitískur.
Mikilvægi landfræðilegrar staðsetningar Íslands með tilliti til varnarmála hefur þannig farið vaxandi á nýjan leik á undanförnum árum en ljóst er að þeirri skoðun hefur vaxið ásmegin á meðal bandarískra stjórnmálamanna, embættismanna og sérfræðinga á sviði varnarmála að alvarleg mistök hafi verið gerð þegar bandarísk stjórnvöld tóku ákvörðun um það árið 2006 að loka varnarstöðinni í Keflavík. Engin áform eru þó uppi að sögn ráðamanna í Washington um að óska eftir varanlegri aðstöðu fyrir bandarískt herlið hér á landi.
HJG
(Ljósmynd: Antony Blinken, utanríkisráðherra Bandaríkjanna. Eigandi: Utanríkisráðuneyti Bandaríkjanna)
Tengt efni:
Fær ESB sæti Frakka í öryggisráðinu?
Vilja að ESB fái eigin hersveitir
Vilja Ísland í evrópskt sambandsríki
Sama gamla stefnan í grunninn